LIFE Timber for All recibe a visita do alumnado do CEGOR en PEMADE
O pasado 4 de setembro, PEMADE recibiu a visita do alumnado do Curso Superior de Especialización en Xestión de Obras de Rehabilitación (CEGOR), organizado pola Fundación Laboral de la Construcción.
Durante a xornada, os asistentes tiveron a oportunidade de coñecer de primeira man os produtos desenvolvidos no marco do proxecto LIFE Timber for All, así como os ensaios de longa duración que se están levando a cabo nos laboratorios de PEMADE sobre os sistemas mixtos madeira-formigón.
A visita permitiu achegar ao alumnado os avances técnicos do proxecto e mostrar o traballo que se está desenvolvendo para validar novas solucións construtivas baseadas no uso de madeira e formigón de baixa pegada de carbono. Estas liñas de investigación buscan contribuír a unha construción máis sostible, industrializada e aliñada cos retos de descarbonización do sector.
O programa incluíu tamén un percorrido polo edificio Impulso Verde, onde se presentaron as solucións construtivas desenvolvidas no marco do proxecto LIFE + Biodinámico. Esta visita permitiu poñer en valor a innovación aplicada á edificación con madeira e o potencial deste material como recurso estrutural en proxectos vinculados á sostibilidade, a eficiencia e a bioeconomía.
A xornada contou coa participación de Manuel Guaita e José Antonio Lorenzana, quen compartiron co grupo a experiencia de PEMADE e os avances dos proxectos desenvolvidos polo equipo no ámbito da construción con madeira, a investigación estrutural e a transferencia de coñecemento ao sector.
Desde LIFE Timber for All agradecemos ao equipo do CEGOR o seu interese e a súa participación nesta xornada de intercambio, que reforza a importancia de achegar a innovación técnica aos futuros profesionais da rehabilitación e a construción sostible.
